مرات مشاهدة الصفحة

الثلاثاء، 7 يونيو 2011

الزياره الغريبه العجيبه








الزياره العجيبه
وفعلا يوم نتيجة الثانويه العامه
اتصل اهل العريس وبعتوا ورد عالبيت
وقالوا حيجوا بعد المغرب
وطبعا من طلعة النهار وانا ميته من الخوف
وبطني بتوجعني من الخوووف

مشً بسبب العريس لااااا
بسبب نتيجة الثانويه
والغريب اني راحت عليا نومه للساعه ١١ صباحا
لاني ما عرفت نام طول الليل من القلق
وصحيت ما لقيت حد بالبيت غير ماما فضلت اعيط
واعيط وماما تهديني تقولي اخوكي راح يشوف النتيجه
لا تخافي وتضحك عليا وتقولي من امتي سقطتي
ما تخافي وفعلا وانا بعيط لقيت اخويا داخل
ومعاه ازايز شربات كتيييييييير
وبيضحك
طبعا وجع البطن مشي والعياط وقف
وابتديت افكر ببعد المغرب
وابتديت اضحك والنتجه كانت حلوه كتييييير
لقً وكمان عريس دي اييه الحلاوه دي كلها
ههه ما كنت اعرف ان حلاوة النجاح اجمل بكتير من
حلاوة الخطوبه
المهم رحت ظبطت شعري واخواتي قاعدين يقولوا
قال عريس قال دي انت ولد اه شكلك بنت بس حتي مش بتعرفي تعملي بطاطس مقليه روحي روحي
بلا هبل
وانا اسمع واكتم غيظي يا خوفي ليقولوا الكلام دي للعريس
وماما مهدت الجو وقالت لبابا وطلبت من اخواتي الكبار يسلموا ويمشوا ما يقعدوا لما ماما وبابا يتكلموا
وانا اطلع بعد اهل العريس ما يقعدوا ربع ساعه
وفعلا عملت كل ال قالته ؟؟ بس المفاجاه
اننا لقينا عيله كامله ام العريس وتلات اخوات بنات للعريس  .. واولادهم .. كل الاحجام ولاد وبنات وواحده منهم حامل .. واخ للعريس كبير بقينا ندور علي كراسي تكفي الضيوف وطبعا مش عارفين نقدم اييه شاي قهوه
ساقع وحلو
 وكل حاجه موجوده وبونبون للاطفال
يادي الكسوف الساقع ما كفي والجو حر وماما طلبت من اخويا يشتري عصير من الحجم الكبير بسرعه
المهم اتهلكنا في الضياقه
 والكلام كان عام بدون ما يتكلموا في اي حاجه
وصراحه بابا اتخنق وقام يصلي وما رجع يقعد معاهم من كتر العيالً الموجودين وضلت ماما تتكلم مع ام واخوات العريس وكل واحده منهم تقعد جنبي شويه ليه مش عارفه
وعجبهم البرفيوم ال بستعمله وافتكرت ماري منيب وهي بتشد شعر خطيبة ابنها وكنت بمسك نفسي من الضحك وما اتكلمت ولا كلمه الا مرسي '،، شكرا  ,, اهلا وسهلا
ولقيت اخته الكبيره بتقرب مني وعملت صحبيه معايا عالسريع وانا طبعا ما صدقت بس ما عرفت اسالها عالعريس وكنت مكسوفه وخجلانه بس عطتني رقم تلفون بيتها وقالت ليً ابقي خلينا نتكلم
بس  انا طلعت عبيطه وسالتها هو فين العريس
وماما كان ناقص تقوم تضربني علي سوالي
بس اخته قالت لي اه هو مشغول شويه وبكره
 حيجي لوحده يقعد مع الوالد
وحبيت اعترض واقول امال انتوا جييتوا ليه
بس مسكت لساني وقمت قعدت بحجرتي شويه من الخنقه
 ولقيت اخويا الكبير قعدً يتريق
ويقولي  ما شاء الله عيله كبيره  ههههههههههههه
لق وايه عصابه يا ماما هههههههههههه
الله يرحمك يا ناني مقدما وفجاه لقيته بيقولي
هو فين العريس
اكيد هرب منهم في السكه وقال يجي بكره لوحده
ههههههههههه وقعد  يضحك كتيييييرً وانا متغاظه
بس رجعت قعدت معاهم ولقتهم بيبركولي عالنجاح
وبيقولولي حتدخلي الجامعه ؟؟؟؟؟؟
ووشهم معوج  عالاخر ؟؟؟؟؟؟
استغربت قلت لنفسي امال ححط الشهاده تحت المخده
قلت اه طبعا اكيد حدخل الجامعه
  لقيت امه بتقول وهو حيعجبه انك تكملي تعليم
 وكمان تدخلي جامعه لما نشوف ؟؟؟؟
قلت لنفسي يا سلام ,,
لقتها بتقولي ان بناتها اخدين تعليم متوسط
واتجوزوا اصل جواز البنت ستره
 وانا ماما بتحظرني ارد علي كلامها
لازم اكون مؤدبه  واتحرق دمي  طبعآآآ
قال تعليم متوسط قال ؟؟
دي انا عايزه اكمل درسات عليا في الشعر والادب
يا لاهوي هو دي تفكيرهم ,,,,,,,,
طيب لما نشوف العريس حيقول اييه بكره
والا يالا بالسلامه بلا وجع دماغ
وكل دي بقوله لنفسي وانا ببتسم ابتسامه
مش عارفه لونها صفره   سوده   مش عارفه
واخر القعده
لقيت بالترتيب ام العريس
 واخواته البنات وكل الاطفال
كلهم كلً واحده تلات اربع عيال
كلهم عايزين يبوسوا العروسه
واتهريت بوس وخاصه ام العريس ال ما تركتني الا وانا تقريبا مغمي عليا وسلمتني لبناتها
واولاد بناتها وواحد منهم صغير حوالي اربع سنين قالي
طنط رحتك احلي من ريحة ماما
وبص لامه وقال لها ماما اعملي زي طنط العروسه وحطي كلونيا زيها
ولا اقولك
يا طنط هاتي الازازه  بتاعة الكولونيا اديها لماما
وكنت حموت من الكسوف
وامه ضربته وعيط وقعدنا نقول لها دي طفل
حصل خير ووشها احمر ونزلت من البيت اول واحده
وكل دي واخو العريس ساكت وبيتفرج علينا انا وماما والبيت
ومشوا
واتنفسنا الصعداء
وفتحنا علبة الشيكولاه ال كان فيها ١٢ حتة شيكولاته بالعدد
 ولقيت ماما بتقول ما لقوش اصغر من كده
دي انا بنتي جميله ودي مش قيمتها
بس بابا قالها.... المهم العريس نفسه يكون كويس مش اي حاجه تانيه
وقعدت طول الليل افكر بالزياره الغريبه العجيبه
وافتكر مُلابسات الموقف
وخفت بسً انتظرت تاني يوم
اكيد كلام بابا مع العريس حيختلف
اكيييييد
وافتكرت كلمة كلونيا
ال قالها الولد ال صغير
ههههههههه كلمه انقرضت من ميت سنه
يالا يظهر انهم دقه قديمه ,,,,
ونمت من كتر التعب
والمره الجايه اقول لكم
اييه ال حصل بزيارة العريس
وكلامه مع بابا
سلام يا حلويي

هناك 14 تعليقًا:

  1. غير معرفيونيو 07, 2011

    مساء الغاردينيا
    ههههههههههههههه
    ايه الزيارة العجيبة دي
    هو انا لسى حستنى لبكرة ولا بعده
    بجد بجد عاوزة اعرف العريس عمل ايه ؟
    ؛؛
    ؛
    بجد سعيدة بـ إكتشاف مدونتك
    أسلوبك جميل وروحك حلوة
    ؛؛
    ؛
    ناني
    لروحك عبق الغاردينيا
    كانت هنا
    reemaas

    ردحذف
  2. ريماس
    لكلماتك عبق الزهور
    ولحضورك رائحة الورود
    ولا تزعلي حكتب الحلقه الجايه بسرعه لعيونك يا قمر
    واهلآآآ وسهلآآآ بحضورك

    ردحذف
  3. غير معرفيونيو 07, 2011

    السلام عليكم نانى
    تحياتى
    نقول الف مبروك بس جات متأخره .. وانا مش حاطول عليكى عشان تصححى الكراريس وتحضرى الدروس وعشان كمان اللى وراكى فى المطبخ .
    تحياتى
    فكشووول

    ردحذف
  4. نانى
    لما أُم العريس جابت لكم علبة شيكولاته وفيها 12 قطعه

    مش كنتى تدوقينا ولو واحده علشان نحكم على ذوق أُم العريس ..

    ...

    بصراحه اسلوبك اكثر من جذّاب

    ومتشوقين للبقية بكل لهفه

    لأن مقابلة العريس أهم شىء فى الموضوع


    مودتى

    ردحذف
  5. أختي ناني ..

    سعيدة بعثوري على مدونتك وان شاء الله من المتابعين لما تكتبين ..

    استمتعت بالقراءة ..

    دمت بخير ..

    ردحذف
  6. على فكرة انا كنت هنا من قبل وعلقت .. راح فين تعليقي ؟؟

    ::::

    عموما سعيدة بعثوري على مدونتك وان شاء الله من المتابعين .
    استمتعت بالقراءة وفي انتظار القادم ..

    دمت بخير .

    ردحذف
  7. الجوكر

    دي الشيكولاته
    وعلبة الشيكولاته
    تحت امركم والله
    بس دي موضوع
    مر عليه سنين
    هههه صراحه كان ازم احط العلبه بالمتحف
    اهلآآآآآ وسهلآآآآ

    ردحذف
  8. وجع البنفسج
    انتي تنوري وسعيده جدآآآآآ بوجودك

    ردحذف
  9. وجع البنفسج
    يظهر مدونتي طلع لها اسنان واكلت تعليقاتك
    اهلييييين يا قمر منوره

    ردحذف
  10. ههههه ..
    والله القصه ممتعه ..تشوقت للجزء القادم ..
    nanny

    ماتتأخريش في الجزء القادم

    متابعتك ..

    ردحذف
  11. قصة رااائعه
    لكن اختي بصراحه اللهجه المصريه ما افهمهاش كتير

    عاوزينك تتكلمي بالفصحه افضل عشان نفهمك ^_^


    اخوك من الكويت

    ردحذف
  12. نآني بجد آٍسلوبك عسسل هههههههه
    كنتي راح تموتيني من الضحك
    الله يسعدك

    ردحذف
  13. موضوع جميل ومدونة اجمل
    شكرا لك

    ردحذف
  14. غير معرفأكتوبر 02, 2011

    hhhhhh ana law 3resy kda h2olo msh mwf2a yla etkl 3ala alah

    ردحذف